Link açıqlığı

Qırımda qırımtatar faali yaqalandı: fevral 5-te Rusiye sıñırcıları Qırım kirişinde Ukrainağa qoltutqan faal Veldar Şukurciyevni yaqaladılar.

«Yaqalav sebepleri belli degil, bir saatten ziyade sıñırcılar ve FSB (Federal havfsızlıq hızmeti) ile «subette» buluna. Şukurciyev «Kalançak» kiriş noqtasında yaqalandı», – dep bildirdi fevral 5-te kündüz Qırım uquq qorçalayıcıları gruppası.

Rusiye mahsus hızmetleri Qırım kirişinde Şukurciyevni bundan evel de yaqalağan ediler.

2015 senesi noyabr 24-de onı yarımada kirişindeki «Kalançak» kiriş noqtasında yaqalağan ediler. Onı sebebini añlatmayıp, 7 saat tutqanlar.

Soñra FSB vekilleri Veldar Şukurciyevni yarımadağa kirsettiler. Faqat, Qırım uquq qorçalayıcı gruppasınıñ malümatına köre, faalge onıñ Rusiyege kirişini 2030 senesine qadar yasaq etken vesiqa berildi. Rusiye Qırımnı özüne ait bir topraq olaraq tanıy, bu sebepten vesiqa Veldar Şukurciyevniñ vaqtınca işğal etilgen yarımada kirişini de yasaq ete.

Uquq qorçalayıcılarnıñ bildirgenine köre, vesiqa keri alındı.

Sıñırcılar ile keçirilgen uzun bir subetten soñ oña şaatlarnıñ ögünde 2030 senesine qadar Rusiyege kirişini yasaq etken vesiqa berildi

«Onıñ Qırım uquq qorçalayıcıları gruppasına bergen malümatına köre, sıñırcılar ile keçirilgen uzun bir subetten soñ oña şaatlarnıñ ögünde 2030 senesine qadar Rusiyege kirişini yasaq etken vesiqa berildi. Faqat belli bir vaqıttan soñ sıñırcılar qaytıp, vesiqanı keri bermege talap ettiler. Vesiqanı alğan soñ onı Qırımğa soñki sefer kirsetkenlerini bildirdiler. Olarnıñ aytqanına köre, Veldar Şukurciyev Qırımda qalmağa istese, Rusiye pasportını almaq kerek. Maşinada onıñnen beraber ketken şaatlar ve yolcular bunı tasdıqladılar», – dep aytıla uquq qorçalayıcılarnıñ haberinde.

Al-azırda Şukurciyev Qırımda buluna.

2016 senesi fevral 22-de Qırımda Şukurciyevniñ Ukraina bayrağı ile fotoresimi boyunca mahkeme toplaşuvı ötkerilecektir.

Veldar Şukurciyev Qırımdaki Ukrain medeniyet merkeziniñ tesisçilerinden biri ola. Ukraina timsallerini qullanğanından sebep Aqmescitte Rusiye politsiyasınıñ hadimleri tarafından bir qaç kere yaqalanğan edi.

Veldar Şukurciyevniñ yaqalanmasına dair resmiy bir malümat yoq Faal «Kalançak» kiriş noqtasında yarımadağa kirgende yaqalanğan edi.

2014 senesi aprel ve mayıs aylarında qırımtatar halqınıñ lideri, Meclisniñ sabıq reisi Mustafa Cemilevniñ ve Meclis reisiniñ mesleatçısı, «Qırım haber agentliginiñ» baş koordinatorı İsmet Yükselniñ Qırımğa kirişleri 5 yıl müddeti ile yasaq etildi. 2014 senesi iyül 5-de «Qırım prokuraturası» Meclis reisi Refat Çubarovğa qarşı da aynı qarar çıqardı.

XS
SM
MD
LG