Link açıqlığı

Qırım kirişinde fevral 5 künü yaqalanğan Ukraina tarafdarı Veldar Şukurciyevni yarımadağa FSB temsilcileri kirsetti. Bu aqta Qırım uquq qoruyıcı gruppası bildire.

«Qırım uquq qoruyıcı gruppasına bergen malümatına köre, sıñır bekçileri ile uzun subetinden soñ oña şaatlar ögünde Rusiye kirişi 2030 senesine qadar yasaq olğanı aqqında bildirüvni berdiler. Amma birazdan sıñırcılar qayttı ve vesiqanı keri bermege talap ettiler. Bildirüvni aldılar, amma Qırımğa soñki sefer kirsetilgeni aqqında tenbiyelediler. Olarnıñ sözlerine köre, eger de Veldar Şukurciyev Qırımda qalmağa istese, Rusiye pasportını almalı. Onıñ ile maşinada ketken şaat, yoldaşları bunı tasdiqlay», – denile beyanatta.

Şimdi Şukurciyev Qırım territoriyasında buluna.

2016 senesi fevral 22 künü Qırımda Şukurciyevniñ Uraina bayrağı ile fotosı boyunca mahkeme toplаşuvı keçirilmeli.

Şukurciyevniñ Qırım kirişinde Rusiye mahsus hızmetleri tarafından birinci yaqalanuvı degildir.

2015 senesi noyabr 24 künü «Kalançak» kiriş noqtasında onı yaqalap, 7 saat tutqan ediler.

Şukurciyev Qırımda Ukrain medeniy merkeziniñ teşkilâtçılarından biri ola. Aqmescitte ukrain timsalleriniñ qullanılması içün bir qaç kere yaqalanğan edi.

Rusiye uquq qoruyıcırı organlarından bu aqta resmiy izaat yoqtır.

Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı tarihiy adaletniñ tiklenmesi dep adlay.

XS
SM
MD
LG