Yarımadada eñ büyük taşıyıcılardan biri olğan «SimSitiTrans» yolbaşçılığı şirketke yaqında kelgen uquq qoruyıcılarnıñ ziyaretini basqı olaraq tanıy. Bu aqta «SimSitiTrans» müdirliginiñ «15 minut» haber saytında aşkâr etilgen beyanatında aytıla.
Memuriyet Qırım Rusiye prokurorı Natalya Poklonskayanıñ «fevral 1 künü şirkette iç bir» maski-şou» olmağanı aqta aytqan sözlerinden çorlana, prokuror degeni kibi, «SimSitiTrans» ofisine silâlı insanlar «yolbaşçılıqqa tapılğan bozuluvlar aqqında qararnı bermek» maqsadı ile keldi.
«Rostransnadzor» temsilcileriniñ ve prokuratura, FSB hadimleriniñ 2016 senesi fevral 1-de «SimSitiTrans» şirketinde etken areketleri vekâletlerniñ suistimalı ile etilgen ve bütün qanuniy talaplarnıñ çerçivesinden çıqa», – denile şirketniñ beyanatında.
«Qanuniyetniñ ve vatandaşlarnıñ anayasa aqlarınıñ bozuluvını Qırım eñ büyük naqliyat şirketiniñ yolbaşçılığı ve hadimlerini qorquzmaq maqsadı ile añlatmaq mümkün. Şirkette bir 400 insan çalışa ve olarnıñ işine Qırım paytahtınıñ içtimaiy sağlığı bağlı. Fikrimizce, qanunnı qorçalamaq mecbur olğan organnıñ hadimleriniñ qanunsız areketleri şirketni qapatmaq içün oña basqı etmek maqsadı ile yapılğan», – deyler «SimSitiTrans»ta.
Fevral 1-de Aqmescitte silâlı belgisiz insanlar «SimSitiTrans» naqliye müessisesiniñ işini blok ettiler. İş adamı Lenur İslâmovnıñ fikirince, silâlı insanlar qorquzmaq içün keldiler.
OOO «SimSitiTrans» şirketini iş adamı, Qırım qamaçavı aktsiyasınıñ koordinatorı Lenur İslâmovnıñ adı ile bağlaylar. Onıñ ATR telekanalı eskiden bu binada yerleşken edi. Qırımda İslâmovğa qarşı cinaiy iş açıldı. İş adamınıñ Qırımdaki mal-mülki tevqif etildi.
Bundan evel Qırımnıñ Rusiye prokuraturası teşkerüv keçirip, müessisege berilgen para cezaları aqqında bildirgen edi.
