Аvropa parlamenti fevral 4 künü qabul etken beyannamesinde Rusiye tarafından işğal etilgen Qırım üzerinde ukrain mustaqilliginiñ qaytarılması içün «Jeneva plüs» formatını teşkil etmek kibi ukrain teşebbüsine qol tuttı.
«AV Rusiye tarafından işğal etilgen Qırım üzerinde ukrain mustaqilliginiñ qaytarılması içün «Jeneva plüs» formatını teşkil etmek kibi ukrain teşebbüsine qol tuta, Rusiyeni Ukraina ve diger taraflar ile Qırımnıñ işğalden azat etilmesi boyunca muzakerelerge başlamağa çağıra», – denile vesiqada.
Ukraina prezidenti Petro Poroşenko Avropa parlamentine Qırım boyunca rezolütsiyanıñ qabul etkeni içün minnetdarlığını bildirdi.
«Ukrain Qırımınıñ azat etilmesinde müim bir adım», – yazdı devlet başı twitterde
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı tarihiy adaletniñ tiklenmesi dep adlay.
