«Maarif» Moskva neşriyatı «Qırımtatar tili (ana tili)», «Qırımtatar edebiyatı», ve «Qırımtatar tili» (yabancı til) fenleri boyunca «yap-yañı» programmalarnı işlep çıqardı.
Bunı Qırım Rusiye ükümetiniñ Tasil nazirliginiñ matbuat hızmeti bildire.
«Programmalar fen boyunca tasil mündericesini deñiştire, ilk sefer talebelerniñ kursnıñ er bir basamağı boyunca oquv faaliyetiniñ şekillerini teklif ete, em de oqutuv ketişatınıñ teminlevi boyunca tevsiyelerni bere», – denile beyanatta.
Mında qayd etilgeni kibi, talebeler «bilgilerini ket-kete ve toqtamayıp kenişlete bile».
Qırım Tasil nazirliginde deyler ki, bu programmalar tek ocalar, qırımtatar tiliiñ ulusşınasları içün degil de, qırımtatar tiliniñ meseleleri ile meraqlanğan bütün mütehassıslar içün «masa kitabı» olur.
Bu neşriyat qırımtatar tilli oqutuvı ile Qırım mektepleri içün 43 serlevalı kitapnı basıp çıqtı, Qırım Tasil nazirliginde aytılğanı kibi, umumtasil mektepler içün qırımtatar tiline tercime etilecek 56 serlevalı derslik bar eken.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı tarihiy adaletniñ tiklenmesi dep adlay.
