Link açıqlığı

Çiygoz «fevral 26 işi» iştirakçileriniñ areketlerine doğru qıymet kesmege çağıra – Celâl


Qırımda apiste yatqan Qırımtatar Milliy Meclisi reisiniñ muavini Ahtem Çiygoz yarımada Rusiye mahsus hızmetleri tarafından «fevral 26» iştirakçilerine nisbeten etilgen qanunsızlıq aqqında bildirile. Bu aqta Meclis reisiniñ birinci muavini Nariman Celâl bildirdi.

«Ahtem Çiygoz bugün aytqanı kibi, onı SİZO şaraitleri degil de («Kurortta olmağanımnı bilem!») oña ve diger balalarğa nisbeten etilgen qanunsızlıq raatsız ete», – yazdı Celâl Facebookta cuma kününe keçer gecesi.

Celâl Ahtem Çiygoznıñ sözlerini bildirdi: «Men mında küreşem, siz ise serbestlikte küreşiñiz, insanlar sizni körsin!»

Bunıñ ile, Celâl atyqanı kibi, Çiygoz «fevral 26» iştirakçileriniñ areketlerine doğru qıymet kesmege çağırdı».

«Kimseni bir şeyde qabaatlamayım, er kes özü qarar bergen edi. Yaş balalar. Bir kimseniñ ruh küçü yetmedi. Amma bazıları öz delillerinde fevral 26 vaqialarına mümkün olmağan qıymet kesti. Canım ağırmadı, amma siz biliñ ve digerlerge aytıñ!» – dep bildirdi Ahtem Çiygoznıñ sözlerini Celâl ve Qırım siyasiy mabüsiniñ ricasını qoştı: ana-babasını ziyaret etmek.

Nariman Celâl şunı añlattı ki, Ahtem Çiygoznı SİZOda «zaruriy kâğıtlarnı» imzalamağa mecbur ete ediler, amma o, «qarar berip» red etti.

Qırım Rusiye prokurorı Natalya Poklonskaya aytqanına köre, «fevral 26» işiniñ bazı iştirakçileri tanıma delillerini berdi.

Rusiye taqiqatçısınıñ malümatına köre, Meclis reisiniñ birinci muavini Ahtem Çiygoz 2014 senesi fevral 26-da Qırım parlamentiniñ binası yanında kütleviy çatışmalarnı teşkil etti, Mustafa Degermenci, Ali Asanov, Eskender Kantemirov, Talât Yunusov, Eskender Yemirvaliyev ise olarğa qoşulğan ediler. O künü Qırım Yuqarı Radasınıñ binası yanında birden eki miting olıp keçken edi. Bir taraftan Ukraina topraq bütünligine qoltutqanlar bar edi. Ekinci taraftan – Qırımnıñ şimdiki «yolbaşçısı» Sergey Aksenov idare etken «Rus birligi» firqasınıñ faalleri. Yüz bergen çatışmada eki insan can berdi, taqiqat malümatına köre, 79 kişi zarar kördi. Mahküm etilgenler qabaatlarını tanımayıp, cinaiy iş siyasiy sebeplerden açılğanını bildireler.

Qırım Yuqarı Mahkemesi «fevral 26 işi» iştirakçilerini Mustafa Degermenci, Ali Asanov ve Ahtem Çiygoznı mart 8-ne qadar apiste qaldırdı

Nevbetteki mahkeme toplaşuvı Qırımda 2016 senesi fevral 15-ne planlaştırılğan.

XS
SM
MD
LG