«Memorial» uquq qoruyıcı merkezi Rusiyede maküm etilgen Cemilevniñ oğlunı Ukrainağa teslim etmege talap eteler.
Bunı uquq qoruyıcı teşkilâtnıñ saytında bildireler.
«Qırım işğali ile bağlı halqara qaidelerniñ bozuluvına köre bile, Rusiyede Cemilevniñ tutılması sebepsizdir. Rusiye akimiyetine işbu cinaiy işke qarışmağa imkân bergen iç bir sebep yoq dep tüşünemiz», – denile beyanatta.
Merkezde bildirilgeni kibi, al-azırda ukrain mahkemesiniñ 2015 senesi aprel 7-de alınğan qanuniy qararı bar.
«Cemilev öz qabaatını tanıdı ve cezanı qabul etti. Böyleliknen, Rusiye ükmü ukrain ükmüni tekrarlay. Fikrimizge köre, ekinci qarar Cemilevniñ Rusiye Federatsiyası territoriyasında tutılmasınıñ qanuniyligini köstermek içün alındı», – deyler merkezde.
Rusiye akimiyetiniñ Hayser Cemilevge nisbeten areketlerini uquq qoruyıcılar Rusiyede kirişi yasaq etilgen babasına basqı aleti olaraq tanıylar.
«Memorial» uquq qoruyıcı merkezi bildirgeni kibi, Rusiye akimiyetiniñ Hayser Cemilevge nisbeten etken areketleri onı babası Mustafa Cemilevniñ siyasiy faaliyeti sebebinden reine olaraq tutalar. Biz Hayser Cemilevni Ukraina akimiyetine teslim etmege talap etemiz», – denile beyanatta.
Rusiye Federatsiyasında maküm etilgen Hayser Cemilev – qırımtatarlarnıñ milliy yetekçisi, Ukraina halq deputatı Mustafa Cemilevniñ oğlu – Astrahan şeeriniñ №10 koloniyasında buluna.
Rusiye Federatsiyasınıñ Yuqarı mahkemesi Hayser Cemilev içün Krasnodar diyarı mahkemesi tarafından berilgen beş yıllıq apis müddetini bir buçuq yılğa qısqarttı. Rusiye ükmü ve 2015 senesi aprel ayında Kiyevniñ Dnepr mahkemesi tarafından belgilengen müddet arasında üç aylıq farq bar – 3 yıl 8 ay.
Hayser Cemilevni 2013 senesi mayıs 27-de onıñ Bağçasaraydaki evinde yaqaladılar. Anda 44 yaşında Fevzi Edemov öldürilgen edi. Militsiya Cinaiy kodeksniñ 115-inci maddesiniñ 1-inci qısmı boyunca (planlaştırılğan öldürüv) cinaiy iş açtı.
Bıltır iyül 10 künü İnsan aqları boyunca Avropa mahkemesi Hayser Cemilevni SİZOdan azat etmek qararını çıqardı. Rusiye bunı yerine ketirmedi.
