Qırımnıñ Rusiye Yuqarı mahkemesi çarşenbe künü, fevral 3-de, «fevral 26 işi» iştirakçisi Mustafa Degermenciniñ mahkemeniñ yanvar 25 künü alğan qarırına şikâyet arizasını lâğu etti ve onı mart 8-ne qadar apiste qaldırdı. Bunı Qırımtatar Milliy Meclisiniñ matbuat hızmeti bildire.
Degermenciniñ advokatı şikâyet arizasında öz noqtaiy nazarını Qırım Rusiye prokurorı Natalya Poklonskayanıñ onı apiste qaldırılması içün delillerniñ zayıf olğanı ile añlattı.
Mustafa Degermenci Aqmescit SİZOsında 2015 senesi mayıs 7-den buna.
«Fevral 26 işi»niñ iştirakçileri – Ahtem Çiygoz, Mustafa Degermenci, Ali Asanov, Eskender Kantemirov, Talât Yunusov, Eskender Emirvaliyev, Eskinder Nebiyev – öz qabaatını tanımay ve işni siyasiy dep adlaylar.
2014 senesi fevral 26-da Qırım parlamenti yanında Ukraina topraq bütünliginiñ tarafdarları ve «Russkoye yedinstvo» («Rusiye birligi») firqasınıñ faalleri arasında teşkil olunğan miting keçti.
Qırım Rusiye tarafından işğal etilgeninden soñ Rusiye uquq qoruyıcıları mitingde iştirak etken qırımtatarlarnı taqip etmege başladı.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı tarihiy adaletniñ tiklenmesi dep adlay.
