Aqyar Rusiye valisi Sergey Menâylo dey ki, Ukraina akimiyeti tarafından Qırım mal qamaçavınıñ lâğu etilmesi «Qırım ve Aqyar yaşayışına az tesir eter».
«Mal qamaçavı ukrain köy hocalığı istisalcı ve iş adamlarına büyük zarar ketirdi. Bugün Qırım ve Aqyar bütün zaruriy şeyler ile teminlengen, erzaq yolağımız tam, ve bir 100% Rusiye istisalından ibaret», – denile Menâylonıñ Facebook safinesinde.
«Ukrain akimiyeti neticede adetiy satuv çarşısını, Qırım ve Aqyar sakinleri tarafından, em de öz vatandaşları tarafından ürmetini ğayıp etti. Şunıñ içün mal qamaçavınıñ lâğu etilmesi – Ukraina akimiyetiniñ bayağı keçiktirilgen areketidir», – dey o.
Kiyevniñ memuriy mahkemesi «Fevral 20 künü uquq qoruyıcı gruppası» cemaat teşkilâtınıñ Ukraina Nazirler Kabinetiniñ №1035 qararınıñ lâğu etilmesi boyunca davasını qabul etti. İşbu qararğa köre, Qırımdan ve Qırımğa qıtaiy Ukrainadan mal ketirilmesi yasaqlana.
Davada aytılğanı kibi, cemaat teşkilâtınıñ temsilcileri Nazirler kabinetiniñ işbu qararını qanunsız tanımağa ve lâğu etmege talap eteler.
Bundan da ğayrı, uquq qoruyıcılar işbu qararnı «vatandaşlarnıñ anayasa ve vatandaşlıq aqlarına zarar ola bileceginden» sebep lâğu etmege çağıralar.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı tarihiy adaletniñ tiklenmesi dep adlay.
