Qırımda tarihiy toponimikanıñ qaytarılması aqqında qanun leyhasına Ukraina Yuqarı Radasına qol tutılması içün deputatlar arasında añlatuv işini keçirmek kerek, dep tüşüne Ukraina Yuqarı Radasınıñ deputatı Оles Doniy, mütenasip vesiqanıñ müellifi.
Bunı o Qırım.Aqiqat Radiosı efirinde bildirdi.
«Cemaat arasında yabancı duşmanlığınıñ seviyesi ve tarihiy ve medeniy bilgilerniñ zayıflığı – pek büyüktir. Mında maarif işi olmalı. Vatanperver deputatlarınıñ sayısı bile çoq olğan vaqıtta (2009 senesi – QA), «portaqal tüslü», bu qanun leyhasına qol tutmadılar», – dey siyasetçi.
Doniyniñ işbu qanun leyhası Ukraina Yuqarı Radasında 2009 senesinden baqıla, amma kerek olğanı qadar reylerni qazanmay.
Ukraina perzidentiniñ qırımtatar halqınıñ işlerinden vekâletlisi Mustafa Cemilev de Ukraina Yuqarı Radasına yarımadanıñ tarihiy toponimikası boyunca ayrı qanunnı qabul etmege tevsiye etti.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı tarihiy adaletniñ tiklenmesi dep adlay.
