Kiyev memuriy mahkemesi Ukrain Nazirler Kabinetiniñ № 1035 ukraina malınıñ qıtadan Qırımğa ve keri ketirilmesini yasaqdağan qararınıñ lâğu etilmesini red etti.
Bu qararnı çarşenbe künü, fevral 3-de, mahkemeciler çıqardı, dep bildire Qırım.Aqiqat mühbiri.
Böyleliknen, mahkeme «Fevral 20 künü uquq qoruyıcı gruppası» cemaat teşkilâtınıñ reisi Dmitriy Nezviskiynin davasını red etti. Mahkeme toplaşuvında Nazirler Kabinetiniñ №1035 qararından zarar körgen qırımlılar ve uquq qoruycılar da bulunğan edi.
Ukraina adliye nazirliginiñ temsilcisi Sergey Rozdobudko vesiqanıñ lâğu etilmesine ve davağa qarşı çıqtı. Amma yazma şekilinde öz itirazını mahkeme bermedi. Onıñ sözlerine köre, nazirlikte bunı azırlamağa yetiştirmediler, çünki işniñ açılması boyunca bildirüv pek keç keldi.
Bu sebepten mahkeme toplaşuvnı fevral 10-na keçirdi.
Kiyevniñ memuriy mahkemesi «Fevral 20 künü uquq qoruyıcı gruppası» cemaat teşkilâtınıñ Ukraina Nazirler Kabinetiniñ №1035 qararınıñ lâğu etilmesi boyunca davasını qabul etti. İşbu qararğa köre, Qırımdan ve Qırımğa qıtaiy Ukrainadan mal ketirilmesi yasaqlana.
Davada aytılğanı kibi, cemaat teşkilâtınıñ temsilcileri Nazirler kabinetiniñ işbu qararını qanunsız tanımağa ve lâğu etmege talap eteler.
Bundan da ğayrı, uquq qoruyıcılar işbu qararnı «vatandaşlarnıñ anayasa ve vatandaşlıq aqlarına zarar ola bileceginden» sebep lâğu etmege çağıralar.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı tarihiy adaletniñ tiklenmesi dep adlay.
