Ukraina Qırım Muhtar Cumhuriyetiniñ işğalden azat etilmesi meselelrinde Avrоpa Şurası ile işbirlikte buluna ve endi «Rusiye ukrain ve qırımtatarlarnıñ aqlarını bozğan yerlerge baracaq yañı komissiya teşkil etildi». Bunı Ukraina prezidenti Petro Poroşenko Şimaliy Avropa ve Baltiya parlamentler reisleriniñ eyyetleri ile körüşüvde bildirdi.
«Prezident Qırımda insan aqlarınıñ bozuluvı ile bağlı bir sıra misallerni ketirdi ve Şimaliy Avropa ve Baltiya parlamentlerini bu meselege diqqat etmege çağırdı. Devlet başı parlament yetekçilerine Ukraina topraq bütünligi ve mustaqilligine qol tutqanları içün minnetdarlığını bildirdi», – denile matbuat hızmetiniñ beyanatında.
Petro Poroşenko Rusiyede qanunsız sürette tutılğan ukrain vatandaşları Nadejda Savçenko, Оleg Sentsov ve digerlerniñ azat etüv meselesine diqqat ayırdı.
Dört insandan ibaret olğan ve İsveçre diplomatı, elçi Jerar Ştudman reberliginde Avropa Şurasınıñ eyyeti Qırımğa yanvar 25 künü keldi. Avropa Şurasınıñ baş kâtibi Turbern Yagland degeni kibi, eyyetni Qırımğa yarımadada insan aqları ile bağlı vaziyetke qıymet kesmek içün yolladı. Bunıñ ile eyyetniñ işi mustaqil olacağını qayd etti, onıñ işi Qırımnıñ territorial statusına bağlı degil eken.
Avropa Şurasınıñ közeticileri Qırımğa soñki bir buçuq yıl içinde kirgen halqara teşkilâtlarnıñ ilk temsilcileri oldı.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı tarihiy adaletniñ tiklenmesi dep adlay.
