Ukraina Yuqarı Radası salı künü «2016 senesi hatıra künleri ve yubileylerniñ qayd etüvi aqqında» qararını qabul etti, oña köre fevral 26 künü devlet seviyesinde qayd etilecek.
Fevral 26 kününi Aqmescitte 2014 senesi Ukraina bütünligine qol tutqan qırımtatarlarnıñ mitinginden eki yılnıñ keçmesi qayd etilecek.
İşbu teklifni parlamentniñ medeniyet meselelerinden komitetniñ reisi Nikolay Knâjitskiy seslendirdi.
«Bundan soñ qırımtatarlarğa Kiyevde mütenasip tedbirlerni keçirmege imkân bermek içün mahsus qarar azırlanacaq», – dey o.
2014 senesi fevral 26-da Qırım parlamenti yanında Ukraina topraq bütünliginiñ tarafdarları ve «Russkoye yedinstvo» («Rusiye birligi») firqasınıñ faalleri arasında teşkil olunğan miting keçti.
Qırım Rusiye tarafından işğal etilgeninden soñ Rusiye uquq qoruyıcıları mitingde iştirak etken qırımtatarlarnı taqip etmege başladı.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı tarihiy adaletniñ tiklenmesi dep adlay.
