Qırımtatarlarnıñ milliy yetekçisi Mustafa Cemilevniñ qızı Elzara Abduljelilova Qırım.Aqiqatqa bildirgeni kibi, fevral 2 künü sabası onıñ Otuz (Kefe) köyünde yerleşken evinde pasport teşkerüvi sebebi ile özlerini Federal migratsion hızmetiniñ (FMS) hadimleri olaraq tanıtqan insanlar keldi.
«Pasport nezaretini keçiremiz dediler, olarnıñ arasında FMS hadimleri edi, eyecandan olarnıñ soyadlarını soramağa unuttım. Bir qaç insan evge kirdi ve pasportlarımıznı alıp, malümatnı yazıp aldılar. Özlerini nezaketli alıp bardılar… Ketkende, oğlum Erol aqqında soraştırdılar», – dey Elzara Abduljelilova.
Aytqanı kibi, oğlu bu saatte evde yuqlay edi. Bunıñ ile FMS hadimleri «soñ vaqıtları soy-soplardan birisi kelmegen edimi», dep soradı.
«Babam aqqında aytsalar, yoq – kelmedi, dep cevap berdim. Tek oğlum», – tarif ete qadın.
Bundan soñ FMS hadimleri ketti, amma birazdan qayttıp, Erolnı «olarnen barıp laf etmege» çağırdılar.
«Tanışlarıma telefon etip soradım, bir yerge barmağa kerekmey dediler. Olarğa red ettik», – dey Abduljelilova. Bunıñ ile ziyaretleri soñuna yetti.
FMS organlarınıñ bu aqta resmiy beyanatları şimdilik yoqtır.
Salı künü, fevral 2-de, Mecliste Canköy rayonında yaşağan qırımtatarlarnıñ evlerinde belgisiz sebepten tintüvler keçirilgeni aqqında bildirgen ediler.
