Link açıqlığı

Qırımnıñ Canköy rayonında bir qaç qırımtatar ailesinde tintüvler keçirile. Bu aqta Qırımtatar aq-uquqlarını qorçalav komitetiniñ idarecisi, Meclis azası Eskender Bariyev bildirdi.

«Canköy rayonında kütleviy tintüvler. Canköy rayonı Avuz Qırq köyünde qırımtatarlarnıñ evlerinde bir buçuq saattır kütleviy tintüvler keçirile. Birazdan tafsilâtlıca», – yazdı o Facebookta.

Qırımtatar Milliy Meclisiniñ birinci muavini Nariman Celâl Qırım.Aqiqatqa Canköy rayonında kütleviy tintüvler aqqında malümatnı tasdiqladı. Onıñ sözlerine köre, tintüvlerniñ sebebi belgisiz, al-azırda malümat ögrenile.

Yanvar 29 künü Lenin rayonında yaşağan qırımtatarlarnıñ evlerinde de tintüvler keçirilgen edi. Qırım Rusiye akimiyetiniñ ya da yerli uquq qoruyıcılarınıñ bu aqta izaatı daa yoq.

Dört insandan ibaret olğan ve İsveçre diplomatı, elçi Jerar Ştudman reberliginde Avropa Şurasınıñ eyyeti Qırımğa yanvar 25 künü keldi. Avropa Şurasınıñ baş kâtibi Turbern Yagland degeni kibi, eyyetni Qırımğa yarımadada insan aqları ile bağlı vaziyetke qıymet kesmek içün yolladı. Bunıñ ile eyyetniñ işi mustaqil olacağını qayd etti, onıñ işi Qırımnıñ territorial statusına bağlı degil eken.

Avropa Şurasınıñ közeticileri Qırımğa soñki bir buçuq yıl içinde kirgen halqara teşkilâtlarnıñ ilk temsilcileri oldı.

Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı tarihiy adaletniñ tiklenmesi dep adlay.

XS
SM
MD
LG