Fevral 1-de Aqmescitte silâlı belgisiz insanlar «SimSitiTrans» naqliye müessisesiniñ işini blok ettiler. İş adamı Lenur İslâmovnıñ fikirince, silâlı insanlar qorquzmaq içün keldiler.
Vaqia şaatları olğanlar Qırım.Aqiqatqa bergen videoda körüne ki, ofiste mahsus işareti olmağan silâlı kişiler bar eti, tahminlerge köre, mahsus hızmetlerniñ hadimleri. Adise şaatları bu vatandaşlarnıñ kim olğanını ögrenmege tırıştılar, müessise hadimleri uquq qoruyıcı organlarını çağırmaq istediler. Belli olmağan vesiqalarnı imzalağan soñ bu adamlar binanı terk etip, «Rostransnadzor» işaretleri ile maşinalarnen kettiler.
Naqliyat saasında federal nezaret hızmetiniñ Qırım devlet yolları nezaretiniñ regionlarara idaresi bergen malümatına köre, özüni Rostransnadzor nevbetçisi olaraq tanıtqan kişi soyadını aytmadı ve izaat bermedi.
«İzaatlar olmaycaq», – dep ayttı hızmetniñ hadimi.
«SimSitiTrans» şirketi ile adı bağlı olğan iş adamıLenur İslâmov binağa kelgenler Qırımdaki Rusiye mahsus hızmetleriniñ hadimleri olğanını aytıp, olarnıñ maqsadı şirketniñ bozuvlarını qayd etmektir, dedi.
«Olar böyle keleler: naqliyat prokuraturası, naqliyat militsiyası, Federal havfsızlıq hızmeti (FSB), «Goblin» memuriyetiniñ hadimleri (Qırımdaki Rusiye akimiyetiniñ yolbaşçısı Sergey Aksenovğa böyle aytalar – QA). Olar beraber kelip, bizim bozuvlarımız bar olğanını bildireler. Aynı vaqıtta, bir de bir vesiqanı qaldırmaylar», – dep ayta İslâmov.
Şirketke kelgen silâlı insanlarğa İslâmov «qorquzuv areketi» ve «basqı usulı» dey.
«Boysunmağanlarğa qarşı daa bir qorquzuv areketilir. Er şeyni alıp ketkenler, tevqif etkenler. «SimSitiTransnı» qapatmağa imkân olsa edi, bunı da yapar ediler. Amma şeerde hızmet etecek o qadar avtobus yoq, olar dayanmağa mecburlar, mence, daa eki afta sabır eterler, soñra da bir şey yaparlar», – dep ayta İslâmov.
OOO «SimSitiTrans» şirketini iş adamı, Qırım qamaçavı aktsiyasınıñ koordinatorı Lenur İslâmovnıñ adı ile bağlaylar. Onıñ ATR telekanalı eskiden bu binada yerleşken edi. Qırımda İslâmovğa qarşı cinaiy iş açıldı. İş adamınıñ Qırımdaki mal-mülki tevqif etildi.
Bundan evel Qırımnıñ Rusiye prokuraturası teşkerüv keçirip, müessisege berilgen para cezaları aqqında bildirgen edi.
