Qırım iş adamı Lenur İslâmov, «Sberbank Rossii» bankınıñ onı müflis tanımaq niyetini izaatlap, «mülkiyetsiz qalmağa azır olğanını» bildire.
«Sberbankka diqqat etmege acet körmyeyim. Vazifesi – mülkiyetimni er angi usul ile tutıp almaq. Amma onı nasıldır bir qanuniy areketlersiz tutıp alsalar, buña soñ narazılıq köstere bilecegimni añlaylar. Şunıñ içün bunı nasıl etmege tüşüneler, şirketlerge bergi belgilendi, esabatlarımnı, bankımda depozitlerni apis, banknıñ lizenziyasını lâğu ettiler. Ukraina tarafından turğan bütün qırımtatarlarnı boğmağa tırıştılar», – dedi İslâmov Qırım.Aqiqatqa.
O şunı da qayd etti ki, muayyen bir mahkeme aqqında aytıp olamaz, çünki mütenasip vesiqaları yoq, amma Rusiyede iş adamını mülkiyetsiz qaldırmaq içün «aselet areket etkenlerini» añlay.
«Anda er şeyimden marum qalacağımnı añlay edim. Rusiye, Qırımda bayağı mülkim bar, bunı er şeyni taşlasam, ailem içün zor olacağını añlay ediler. Qadınım ğayrı menkul malnı qurdı, men bergi ödey edim, şirketten ise milliardlarnen qazanç kele edi. Er şeyni taşladım. Amma anda bulunmağa acet yoq, böyle Rusiyeni körmege istemeyim», – dey İslâmov.
Aqmescitte fevral 1 künü belgisiz maskalı ve silâlı insanlar «SimCityTrans» Qırım taşıyıcısınıñ işini blok etti.
«SimCityTrans» şirketini Qırım qamaçavınıñ idarecisi Lenur İslâmovnıñ adı ile bağlaylar. Onıñ ATR telekanalı işbu şirketniñ binasında yerleşe. Qırımda İslâmovğa nisbeten yerli uquq qoruycılar cinaiy işlerni açtı. İş adamınıñ mülkiyetini apis ettiler.
