Qırımtatar Miilliy Meclisiniñ reisi Refat Çubarov bildirgeni kibi, Avropa Şurası eyyeti yanvar 31 künü Qırımda işini bitirip, yarımadadan ketti.
Bunı Çubarov Facebookta yazdı.
«Jerar Ştudman efendi ve onı ozğarğan üç işdeşi olarğa yarımada işğalci akimiyeti teklif etken Qırımdaki bulunuv programmasını bütünley deñiştirip ve Qırımtatar Milliy Meclisiniñ azaları, qırımtatar ve ukrain cemaat teşkilâtlarınıñ vekilleri, faaller, jurnalistler ile körüşip oldılar”, – dep yazdı o.
Çubarov Meclis adından Avropa Şurasınıñ Baş kâtibi Turbyern Yaglendge işbu ziyaret içün minnetdarlığını bildirdi.
«Qırımtatar Milliy Meclisiniñ yolbaşçılığı ileride de yarımadada Qırımnıñ işğali şaraitlerinde insan aqlarınıñ nezareti boyunca Halqara eyyetiniñ daimiy bulunuvı içün areket etecek», – dedi Çubarov.
Avropa Şurasınıñ eyyeti tarafından Qırımda işiniñ bitirmesi aqqında resmiy malümatı daa yoq.
Dört insandan ibaret olğan ve İsveçre diplomatı, elçi Jerar Ştudman reberliginde Avropa Şurasınıñ eyyeti Qırımğa yanvar 25 künü keldi. Avropa Şurasınıñ baş kâtibi Turbern Yagland degeni kibi, eyyetni Qırımğa yarımadada insan aqları ile bağlı vaziyetke qıymet kesmek içün yolladı. Bunıñ ile eyyetniñ işi mustaqil olacağını qayd etti, onıñ işi Qırımnıñ territorial statusına bağlı degil eken.
Avropa Şurasınıñ közeticileri Qırımğa soñki bir buçuq yıl içinde kirgen halqara teşkilâtlarnıñ ilk temsilcileri oldı.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı tarihiy adaletniñ tiklenmesi dep adlay.
