Link açıqlığı

Avropa parlamentiniñ toplaşuvında qırımtatarlarnıñ yarımadadaki vaziyetini muzakere etecekler


Strasburgda fevral 1-4 künleri keçirilecek Avropa parlamentiniñ toplaşuvında Avropada qaçaqlarnıñ meselesini muzakere etecekler. Amma, bundan da ğayrı, kün tertibinde Qırımdaki insan aqları ile bağlı vaziyetni muzakere etmege planlaştıralar, dep bildire Avropa parlamentiniñ matbuat hızmeti.

Qırım meselesini cumaaqşamı, fevral 4 künü, muzakere etecek olalar. Şu cumlden, şimdi işğal etilgen Qırımda yaşağan qırımtatarlarnıñ vaziyeti baqılacaq.

Qırımtatar Milliy Meclisinde ve halqara uquq qoruyıcı teşkilâtlar Qırımda insan aqlarınıñ bozuluvı aqqında bildirgen ediler. Amma Rusiye akimiyeti bunı red ete.

Dört insandan ibaret olğan ve İsveçre diplomatı, elçi Jerar Ştudman reberliginde Avropa Şurasınıñ eyyeti Qırımğa yanvar 25 künü keldi. Avropa Şurasınıñ baş kâtibi Turbern Yagland degeni kibi, eyyetni Qırımğa yarımadada insan aqları ile bağlı vaziyetke qıymet kesmek içün yolladı. Bunıñ ile eyyetniñ işi mustaqil olacağını qayd etti, onıñ işi Qırımnıñ territorial statusına bağlı degil eken.

Avropa Şurasınıñ közeticileri Qırımğa soñki bir buçuq yıl içinde kirgen halqara teşkilâtlarnıñ ilk temsilcileri oldı.

Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı tarihiy adaletniñ tiklenmesi dep adlay.

XS
SM
MD
LG