Aqmescitte cumaertesi künü, yanvar 30-da, Qırımtatar Milliy Meclisiniñ azaları, qırımtatar cemaatçılığı Avropa Şurasınıñ eyyeti ile körüşti. Bunı Meclis reisiniñ birinci muavini Nariman Celâl bildirdi.
«15 minut» saytına bildirgeni kibi, körüşüv iştirakçileri «eyyet azalarına Qırımda insan aqları, qırımtatar halqınıñ aqları ile bağlı vaziyetine olğan dünya baqışları aqqında, muayyen bozuluvlar aqqında tarif ettiler».
«Ştudman efendi ve onıñ işdeşlerine körüşüv içün minnetdarmız. Avropa Şurası temsilcileriniñ Qırım ziyaretiniñ maqsadını añlaymız ve yarımadada insan aqları boyunca nezaret gruppalarınıñ daimiy bulunuvı ile bağlı tilegimizni bildirdik», – dey Nariman Celâl.
Onıñ sözlerine köre, körüşüvde on dört qırımtatar cemaat erbabı iştirak etti: Meclis azaları, regional meclislerniñ temsilcileri, siyasiy mabüs ve esir alınğan qırımtatarlarnıñ tuvğanları, uquq qoruyıcılar.
Cumaertesi künü Eho Moskvı bildirgeni kibi, Avropa Şurasınıñ eyyeti yarımadada işini yanvar 30 künü bitire.
Dört insandan ibaret olğan ve İsveçre diplomatı, elçi Jerar Ştudman reberliginde Avropa Şurasınıñ eyyeti Qırımğa yanvar 25 künü keldi. Avropa Şurasınıñ baş kâtibi Turbern Yagland degeni kibi, eyyetni Qırımğa yarımadada insan aqları ile bağlı vaziyetke qıymet kesmek içün yolladı. Bunıñ ile eyyetniñ işi mustaqil olacağını qayd etti, onıñ işi Qırımnıñ territorial statusına bağlı degil eken.
Avropa Şurasınıñ közeticileri Qırımğa soñki bir buçuq yıl içinde kirgen halqara teşkilâtlarnıñ ilk temsilcileri oldı.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı tarihiy adaletniñ tiklenmesi dep adlay.
