Link açıqlığı

Bucurova ve Akadırov Avropa şurası eyyetine Qırımda jurnalistlerniñ işi aqqında tarif ettiler


Qırım jurnalisti Lilâ Bucurova bildirgeni kibi, yanvar 30-da o ve Qırım blogeri Zair Akadırov İnsan aqları boyunca Avropa Şurasınıñ baş kâtibiniñ temsilcisi Jerar Ştudman ve eyyetniñ diger vekillerine Qırımda jurnalistlerniñ şimdiki işi aqqında tarif ettiler.

«İnsan aqları boyunca Avropa Şurasınıñ baş kâtibiniñ mahsus temsilcisi Jerar Ştudman ve onıñ işdeşleri ile körüşüvden qayttım. Men ve zenaatdaşım Zair Akadırov Avropa diplomatlarına Qırımda jurnalistlerniñ bugünki işi aqqında tarif ettik», – yazdı o Facebookta.

Dört insandan ibaret olğan ve İsveçre diplomatı, elçi Jerar Ştudman reberliginde Avropa Şurasınıñ eyyeti Qırımğa yanvar 25 künü keldi. Avropa Şurasınıñ baş kâtibi Turbern Yagland degeni kibi, eyyetni Qırımğa yarımadada insan aqları ile bağlı vaziyetke qıymet kesmek içün yolladı. Bunıñ ile eyyetniñ işi mustaqil olacağını qayd etti, onıñ işi Qırımnıñ territorial statusına bağlı degil eken.

Avropa Şurasınıñ közeticileri Qırımğa soñki bir buçuq yıl içinde kirgen halqara teşkilâtlarnıñ ilk temsilcileri oldı.

Lilâ Bucurova FSB hadimlerine qarşı mahkeme davasını açqan jurnalistlerden ola. Qırımda 2015 senesi noyabr 2 künü ATR qırımtatar telekanalınıñ sabıq hadimleriniñ – Elzara İslâmova, Lilâ Bucurovanıñ evlerinde ve telekanal saibi Lenur İslâmovnıñ ana-babasınıñ ve Moskvadaki onıñ şahsiy evinde tintüvlerni keçirdiler. Bu sene mayıs ayında ATR sabıq baş müdiri Elzara İslâmova Lilâ Bucurova ile birlikte «QARA DEÑİZ PRODUCTION» mustaqil production studiyasını teşkil ettiler.

Yanvar 15 künü Qırım Yuqarı mahkemesiniñ binası yanında, «fevral 26 işi» boyunca mahkeme toplaşuvınıñ başlanmasını beklegen qırımtatar jurnalisti Zair Akadırovnı yaqaladılar. Zair Akadırovnı onıñ zenaat faaliyeti aqqında soraştırdı ve bir saat devam etken sorğudan soñ azat ettiler. Bunıñ ile, jurnalistniñ aytqanına köre, onı mecburen Ekstremizmge qarşılıq boyunca merkezge alıp ketmege istey ediler, qorquzdılar.

XS
SM
MD
LG