Aqmescitte yanvar 29 künü belgisiz şahıslar Krut Qaramanları Hatıra Kününe Şevçenko abidesine çeçeklerni ketirdiler. Amma birazdan vandallar destelerni aramladılar. Bunı içtimaiy ağlarda şeer sakinleri bildire.
«Bir de bir merametli insan çeçeklerni ketirdi. Krut qaramanları aqlımızda olğanı pek eyidir. Birazdan çeçeklerni dağıtıp qoydılar. Şevçenko o qadar qorqunçlımı? Çeçekler qorqunçlımı? Amma, evel ukrain akimiyeti Qırımda yapıp olamağan şeyni Qırım vatanperverleri ete – qırımlılar ukrain bayramlarını hatırlamağa başladı. Olarğa lâqayt degiller. Demek, birazdan öz diqqatını medeniy şekilde köstermege ögrenirler», – yazalar şeer sakinleri.
Şevçenko adına şeer bağçası – ukrain faalleri içün timsaliy bir yerdir. Qırım işğalinden soñ Rusiye mahsus hızmetleri mında daima Ukraina tarafdarlarını yaqalay edi. Ukraina devlet bayramları arfesinde politsiya hadimleri abide yanında nezaretni alıp bara.
