Ukraina Tış işler nazirliginde yanvar 29 künü Rusiye akimiyeti tarafından siyasiy sebeplerden yaqalanğan ukrainlerniñ süretleri ile serginiñ devamını taqdim ettiler. Leyha Qırımtatar Milily Meclisi reisiniñ muavini Ahtem Çiygoznıñ «fevral 26 işi» boyunca yaqalanmasına bağışlana.
Leyha maqsadı - Ukraina Tış işler nazirliginiñ çetel musafirleriniñ diqqatını ukrain mabüsleriniñ problemasına celp etmek ve «maznunlarnıñ ruhunı kötermek». Bunı serginiñ açılışında Meclis azası Eskender Bariyev bildirdi, haber ete Qırım.Aqiqat mühbiri.
«Birinci maqsat – halqara cemaatçılıq ve çeşit memleketlerniñ nazirlikleriniñ temsilcilerini bu problema, «işğalci akimiyetiniñ qanunsızlığı» altında bulunğan maznunlar aqqında haberdar etmek. Ve, bu aktsiya aqqında bilip, maznunlarnıñ, tuvğanlarınıñ, qırımtatar halqı ve işğal etilgen territoriyada bulunğan Ukraina vatandaşlarınıñ ruhu köterinir», – dedi Bariyev.
Tedbirde qırımtatarlarnıñ milliy yetekçisi, Ukraina Yuqarı Radasınıñ deputatı Mustafa Cemilev, Qırımtatar Milliy Meclisiniñ reisi Refat Çubarov ve qırımtatarlarnıñ timsaliy organınıñ diger azaları, Ukraina Tış işler nazirliginiñ temsilcileri ve cemaat erbaplarınıñ iştiraki beklenile.
Tedbir teşkilâtçıları – Qırımtatar Resurs Merkezi, «Yevromaydan SOS», Qırımtatar Milliy Meclisi ve Ukraina Tış işler nazirligi, Eroupean Endowment for Democracy. Teşkilâtçılarnıñ malümatına köre, leyha #LetMyPeopleGo kampaniyasınıñ qısmıdır. Taqdimi saat 11:00 başlanacaq.
