Kiyevde Freedom House leyhalarınıñ idarecisi Zorân Kis Avropa Şurasınıñ baş kâtibiniñ mahsus temsilcisi Jerar Ştudmannıñ Qırımtatar Milliy Meclisi reisiniñ muavini Ahtem Çiygoz ile ola bilecek körüşüvini «müsbet adım» olaraq adladı.
Bunı Zorân Kis Qırım.Aqiqat Radiosınıñ efirinde bildirdi.
«Menimce, bu – Rusiyege çeşit taraflardan etilgen halqara basqınıñ neticesidir. Ve bu, müsbet adım, muayyen kerilemedir», – dey o.
İşğal etilgen Qırımnıñ Rusiye prokurorı Natalya Poklonskaya dey ki, Avropa Şurasınıñ baş kâtibiniñ mahsus temsilcisi Jerar Ştudmannıñ «esktremist yönelişi olğan cinaiy işlerniñ etilmesinde qabaatlanğan» bazı mabüsler ile körüşüvine qol tutacaq.
Ahtem Çiygoz Rusiye Federatsiyasınıñ Taqiqat komitetininde «kütleviy tertipsizliklerde iştirak etüvinde şeklengeni» boyunca sorğu devamında yaqalandı. Çiygozdan ğayrı, qırımtatar faalleri Mustafa Degermenci, Ali Asanov, Eskender Kantemirov, Talât Yunusov, Eskender Emirvaliyev, Eskеnder Nebiyevni da yaqaladılar.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı tarihiy adaletniñ tiklenmesi dep adlay.
