Link açıqlığı

Qırım ve Aqyar işleri boyunca Ukraina devlet hızmeti yanında cemaat şurasını teşkil etecekler. Bu teşebbüs «Fevral 20 künü uquq qoruyıcı gruppası» cemaat teşkilâtınıñ reisi Aleksandr Liyevke ait.

Kiyevde teşebbüs gruppasınıñ teşkil etilmesi boyunca iş toplaşuvı endi keçti, dedi Liyev Qırım.Aqiqatqa.

Onıñ malümatına köre, işbu toplaşuvnı Qırım ve Aqyar işleri boyunca Ukraina devlet hızmetiniñ başı Nariman Ustayev keçirdi. Mında Qırım cemaatçı ve uquq qoruyıcıları iştirak etti.

«Bu cemaat şurası bütün Qırım cemaat teşkilâtları ve Devlet hızmeti arasında bağlayıcı olmalıdır. Planlarımızğa köre, bu cemaat şurası Qırım ve onıñ işğal etilmesine bağlı olğan bütün uquqiy qararlarnıñ cemaat muzakeresi içün meydançıq olmalıdır. Maqsadımız – iç bir uquqiy vesiqa qırımlılarnıñ muzakeresi olmadan qabul etilmemeli», – dey Liyev.

O dey ki, cemaat şurasına vekillerni rey berüv vastası ile saylaycaqlar. «Vekillerniñ Qırım ve onıñ işğal etilmesine bağlı olğan meselelerde yapqan işi diqqatqa alınacaq», – dey Liyev.

Qırım ve Aqyar işleri boyunca Ukraina devlet hızmeti yanında cemaat şurasınıñ ilk toplaşuvı aprel ayında olacaqtır.

Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı tarihiy adaletniñ tiklenmesi dep adlay.

XS
SM
MD
LG