Cuma künü, yanvar 29-da, Ukraina Tış işler nazirliginde «fevral 26 işi»niñ birinci iştirakçisi – Qırımtatar Milliy Meclisi reisiniñ birinci muavini Ahtem Çiygoznıñ yaqalavı yıllığına bağışlanğan sergini azırlaylar.
Şu cümleden, ukrain Tış işler nazirliginde Rusiye akimiyeti tarafından siyasiy sebeplerden yaqalanğan ukrainler süretleriniñ sergisiniñ devamı taqdim etile.
«Rusiyede siyasiy ukrain-reineleriniñ süretleriniñ 2015 senesi noyabr ayında taqdiminden soñ galereyağa «Qırım reine»leriniñ süretleri qoşulacaq», – deyler teşkilâtçılar.
Leyha maqsadı – Rusiye tarafından vaqtınca işğal etilgen Qırımda ukrain maznunlarnıñ meselesine Ukraina Tış işler nazirliginiñ resmiy çetel musafirleriniñ diqqatını çekmektir.
Tedbirde qırımtatarlarnıñ milliy yetekçisi, Ukraina Yuqarı Radasınıñ deputatı Mustafa Cemilev, Qırımtatar Milliy Meclisiniñ reisi Refat Çubarov ve qırımtatarlarnıñ timsaliy organınıñ diger azaları, Ukraina Tış işler nazirliginiñ temsilcileri ve cemaat erbaplarınıñ iştiraki beklenile.
Tedbir teşkilâtçıları – Qırımtatar Resurs Merkezi, «Yevromaydan SOS», Qırımtatar Milliy Meclisi ve Ukraina Tış işler nazirligi, Eroupean Endowment for Democracy. Teşkilâtçılarnıñ malümatına köre, leyha #LetMyPeopleGo kampaniyasınıñ qısmıdır. Taqdimi saat 11:00 başlanacaq.
Mustafa Degermenci, Ali Asanov ve Ahtem Çiygoz bir buçuq yıl evelsi fevral 26 künü Qırım parlamenti yanında Ukraina topraq bütünliginiñ tarafdarları ve «Russkoye yedinstvo» («Rusiye birligi») firqasınıñ faalleri arasında teşkil olunğan «kütleviu tertipsizliklerde» iştirak etüvleri içün qabaatlana.
Qırım Yuqarı Mahkemesi «fevral 26 işi» iştirakçilerini Mustafa Degermenci, Ali Asanov ve Ahtem Çiygoznı mart 8-ne qadar apiste qaldırdı
