Ukraina Tış işler nazirligi Avropa Havfsızlıq ve işbirlik boyunca teşkilâtını Qırımda ve memleketniñUkraina nezareti altında olmağan rayonlarında insan aqlarınıñ bozuluvına seslenmege çağıra. Bunı ОSCEde Almaniyanıñ reisligine bağışlanğan tögerek masa toplaşuvında Ukraina Tış işler nazirliginiñ halqara teşkilâtlar departamentiniñ müdir muavini Vasiliy Pokotilo bildirdi.
«ОSCE işğal etilgen Qırımda ve ukrain akimiyeti tarafından vaqtınca nezaret etilmegen Donetsk ve Lugansk vilâyetilerinde insan aqlarınıñ bozulmasına seslenmege kerektir dep tüşünemiz», – dey Pokotilo.
O şunı da qayd etti ki, Ukraina ОSCE ve onıñ institutları, şu cümleden ОSCEniñ milliy azlıqlarnıñ işleri boyunca Yuqarı komissarı ile işbirlik qurmağa azır ve ОSCE Ukrainanıñ işğal etilgen territoriyalarında insan aqları ile bağlı vaziyetni taqip etecegine ümüdini bildirdi.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı tarihiy adaletniñ tiklenmesi dep adlay.
