Strasburgda Ukraina prezidentiniñ qırımtatar halqınıñ işlerinden vekâletlisi Mustafa Сemilev Rusiyeniñ muhalif Halq serbestligi firqasınıñ yetekçisi Mihail Kasyanov ile körüşti, o, milliy liderni Rusiye tarafından işğal etilgen Qırımnıñ Ukrainağa qaytarılacağına işandırdı.
Bunı vekâletliniñ matbuat hızmeti bildirdi.
Kasânov Bоris Nemtsovnıñ hatırasına bağışlanğan Avropa Şurasınıñ Parlament Assambleyasınıñ toplaşuvında iştirak etti. Beyanatta bildirilgeni kibi, Kasyanov Rusiyede siyasiy ve iqtisadiy vaziyetniñ beterleşmesini qayd etti.
«Qırım eñ soñunda azat etilip, Ukrainağa qaytarılacağında emin oluñız», – dep bildire Kasyanovnıñ sözlerini Cemilevniñ matbuat hızmeti.
Evel Rusiye muhalifi qırımtatarlarnıñ BMT beyannamesine köre yarımadanıñ özüni belgilev aqqı aqqında meseleni kötermege imkânı bar olğanını qayd etken edi.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı tarihiy adaletniñ tiklenmesi dep adlay.
