Link açıqlığı

Qırım prokuraturası bloger Zair Akadırovnı yaqalağan politsiya hadimleriniñ areketlerini teşkerecek


Qırım blogeri Zair Akadırov Qırım Rusiye prokuraturasına Aqmescitte yanvar 15 künü onı yaqalamağa tırışqan politsiya hadimleriniñ qanunsız areketleri boyunca qararlarnı almağa ve teşkerüvni keçirmege ricası ile muracaat etti. Bunı o çarşenbe künü yanvar 27 künü öz Facebook saifesinde bildirdi.

Onıñ sözlerine köre, kündüz yanvar 27 künü o advokatı Emil Kürbedinov ile Aqmescitniñ Demiryol rayonı prokuraturasına yol aldı.

«Celpnameniñ müddeti keçkenine, kerek olğanı kibi yazılmağanına ve meni kelmege mecbur etmegenine baqmadan, avdokatlarnıñ tevsiyelerine köre, prokuraturağa barıp, maña olğan diqqatnıñ sebebini ögrenmege qarar berdim», – dey Zair Akadırov.

Zair Akadırovnıñ aytqanı kibi, körüşüvde rayonnıñ prokurorı Lübov Kardaş prokuraturanıñ Qırım blogerine «iç bir itirazı yoq».

Onıñ sözlerine köre, «Qırım Yuqarı Mahkemesi yanında yüz bergen yaqalav ile bağlı cemaat diqqatını, matbuat vastalarında keñ muzakereni nazarğa alıp», olğan vaqianıñ teşkerüvni keçirmege qarar berdiler.

«Men Kardaş ve muavinine politsiya hadimlerine itirazım bar olğanını ayttım, şu sırada, menim serbest areketimni sıñırlağan, mahkeme binası yanında meni yaqalağan, maşinada qorquzğan, soñra ise politsiya rayon bölügine ketirip, amma protokolnı tizmegen Şambazov Ruslan Rinatoviç ve OMON hadimlerine itirazım bar. «Men ve yaqınlarım şimdi qorqamız, çünki mennen bir şey ola bile», – dedim men prokuratura hadimlerine. «Qorqmağa acet yoq», – külip dedi maña Kardaş», – dey Akadırov.

Qırım blogeriniñ sözlerine binayen, subetten soñ prokurorğa arizasını berdi, mında mahkeme binası yanında olğan ziddiyetniñ tafsilâtlarını yazıp qaldırdı.

«Qırım prokurorı Natalya Poklonskayanıñ adına yazılğan añlatuvğa Aqmescitniñ Demiryol rayonı prokurorı adına arizamnıñ kopiyası qoşulğan. Bunıñ ile arizağa Qırım Yuqarı Mahkemesiniñ binası yanında olğan ziddiyetniñ videoyazısı ile CD da berecegim. Onda politsiya hadimleriniñ maña qarşı qorquzuvları yazılğan», – dedi Zair Akadırov.

Mında Qırım blogeriniñ bildirüvine 30 kün içinde cevap bermege vade eteler.

Yanvar 15 künü Qırım Yuqarı mahkemesiniñ binası yanında, «fevral 26 işi» boyunca mahkeme toplaşuvınıñ başlanmasını beklegen qırımtatar jurnalisti Zair Akadırovnı yaqaladılar. Zair Akadırovnı onıñ zenaat faaliyeti aqqında soraştırdı ve bir saat devam etken sorğudan soñ azat ettiler. Bunıñ ile, jurnalistniñ aytqanına köre, onı mecburen Ekstremizmge qarşılıq boyunca merkezge alıp ketmege istey ediler, qorquzdılar.

Qırım Rusiye tarafından işğal etildi.

XS
SM
MD
LG