Advokat Nikolay Polozov aytqanı kibi, Aqmescitte yanvar 27-ne planlaştırılğan «fevral 26 işi» boyunca mahkeme toplaşuvını başqa künge qaldırdılar. Onıñ malümatına köre, buña sebep – maznunlarnıñ biri – Eskender Kantemirovnıñ hastahanege tüşmesi oldı.
«Qırımda «fevral 26 işi» boyunca mahkeme toplaşuvı maznun Kantemirovnıñ hastahanege tüşmesinden sebep 15.01.16 kününe avuştırılğan. Şunı qayd etmek kerek ki, toplaşuvnı başqa künge keçirmege prokuratura rica etken edi. Avropa Şurası eyyetiniñ mahkemege kele bileceginden qorqqanlar», – yazdı o Facebookta.
Aqmescitte çarşenbe künü, yanvar 27-de, Rusiye uquq qoruyıcıları Qırım Yuqarı mahkemesi binasınıñ qoruvını quvetleştirdiler. «Fevral 26 işi»niñ iştirakçilerinden biri, Qırımtatar Milliy Meclisi reisiniñ muavini Ahtem Çiygoznıñ advokatı Nikolay Polozov Qırımda bulunğan Avropa Şurası eyyetiniñ temsilcilerine yanvar 27 künü keçirilecek mahkeme toplaşuvına kelmege teklif etken edi.
Qırım Yuqarı Mahkemesi «fevral 26 işi» iştirakçilerini Mustafa Degermenci, Ali Asanov ve Ahtem Çiygoznı mart 8-ne qadar apiste qaldırdı.
Mustafa Degermenci, Ali Asanov ve Ahtem Çiygoz bir buçuq yıl evelsi fevral 26 künü Qırım parlamenti yanında Ukraina topraq bütünliginiñ tarafdarları ve «Russkoye yedinstvo» («Rusiye birligi») firqasınıñ faalleri arasında teşkil olunğan «kütleviu tertipsizliklerde» iştirak etüvleri içün qabaatlana.
