Avropa Şurasınıñ Parlament assambleyası Qırım ve ATO rayonlarını, ukrain qanunlarına baqmadan, ziyaret etken Avropa deputatlarına mesüliyet aqqında qarar aldı, dep bildire PACEde Ukraina eyyetiniñ reisi muavini, Ukraina halq deputatı Georgiy Logvinskiy.
Deputat bildirgeni kibi, PACEde Assambleya azalarında olğan immunitetni yalıñız PACE işinde qullanmağa mümkün.
«Başqa bir vaziyetlerde Avropa deputatları milliy qanuniyetke köre areket etmeli. Eger de ATO rayonı ya da işğal etilgen territoriyağa kiriş yalıñız Ukraina akimiyetiniñ izni ile mümkün olğanı aqqında yazılsa – demek, izin al da, soñ ise ziyaretni planlaştır. İzinsiz kirsen – mesüliyetni kör. Qanuniyetimizge köre – cinaiy mesüliyetni», – yazdı Logvinskiy Facebookta.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı tarihiy adaletniñ tiklenmesi dep adlay.
