Strasburgda Ukraina prezidentiniñ qırımtatar halqı işleriniñ vekâletlisi Mustafa Cemilev Türkiye Tış işler naziri Mevlüt Çavuşoğlu ile körüşti. Körüşüv devamında Qırımnıñ işğalden azat etilmesi üzerinde çalışmağa imkân berecek mahsus halqara işbirlik şekliniñ meydanğa ketirilmesini muzakere ettiler, dep bildire Meclisniñ matbuat hızmeti.
«Bizim tarafımızdan 1994 senesi Budapeşt memorandumınıñ iştirakçi memleketleri ve Türkiye kirecek halqara gruppanı teşkil etmege teklif etile. Bu ğaye endi Ukraina prezidenti ve tış işler naziri ile muzakere etildi ve olar oña qol tuttılar», – denile beyanatta.
Mında şunı da qayd ettiler ki, öz tarafından Mevlüt Çavuşoğlu teşebbüske qol tuttı. Tafsilâtlıca bu mesele bu sene fevral ayında Kiyevde Türkiye Tış işler naziri ile muzakere etilecek.
Ukraina prezidentiniñ qırımtatar halqınıñ işlerinden vekâletlisi, qırımtatarlarnıñ yetekçisi, Ukraina halq deputatı Mustafa Cemilev Frenkistan Strasburg şeerine Avropa Şurasınıñ Parlament assambleyasınıñ ukrain eyyeti erkânında keldi. Vaqtınca işğal etilgen Qırım ve Ukrainağa qarşı Rusiye istilâsına mında bir qaç tedbir ve «tögerek masa» bağışlanacaq. Şu cümleden, Ukraina prezidentiniñ qırımtatar halqınıñ işlerinden vekâletlisininñ iştiraki ile Qırımnıñ şimdiki vaziyeti boyunca matbuat konferentsiyası keçirilecek
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı tarihiy adaletniñ tiklenmesi dep adlay.
