Rusiye Havfsızlıq şurasınıñ başı Nikolay Patruşev «Moskovskiy komsomolets» gazetasına bildirgeni kibi, Rusiye tarafınlan Qırım işğali «halqara uquq qaidelerine» ve BMT nizamnamesine lâyıq olğan edi.
Onıñ fikrine köre, «Qırımnıñ Rusiye terkibine kirmesi yerinde yarımadada qan töküvi ola bile edi».
Rusiye Havfsızlıq şurasınıñ kâtibi Ukraina yolbaşçılığını takbih etti ve olarnı «memleketniñ Rusiyeden uzaqlaşmasına yönelgen yabancı iradesini yerine ketirgen AQŞ tarafdarları» olaraq adladı. Bunıñ ile o şuña da diqqat etti ki, Donbass Ukraina terkibinden çıqmadı ve Ukrainanıñ bölünmesi Moskvanıñ merağında olmağanını bildirdi.
Bundan da ğayrı Patruşev şunı da qayd etti ki, AQŞ Rusiyeni zayıflaştırmaq içün «onıñ qocaman mineral resurslarına irişimni elde etmege» tırışa. Rusiye ve Ğarp arasında munasebetlerniñ bozuluvında da Patruşev AQŞnı qabaatladı.
Patruşev dey ki, «AQŞ dünyada ileri memleket olmağa istey».
«Olarğa küçlü Rusiye kerekmey. Aksine, memleketimizni mümkün olğanı qadar zayıflaştırmağa isteyler. Bu maqsatqa irişmek içün, Rusiye Federatsiyasınıñ dağılması da mümkün. Birleşken Ştatlar içün Rusiyeniñ zengin resurslarına irişim açılır», – dey o.
Keçken afta Londonda FSB sabıq hadimi Aleksandr Litvinenkonıñ öldürüvi şaraitleri aqqında aşkâr etilgen malümatlarda Patruşev onıñ öldürüvi boyunca ameliyatnıñ yolbaşçısı olaraq belgilendi.
