Rusiye Tış işler naziri Sergey Lavrov Rusiye işğal etilgen Qırımnıñ Ukrainağa qaytarılması boyunca muzakerelerni keçirmeycegini bildirdi.
«Qaytarılacaq bir şey yoq, Qırımnıñ qaytarılması aqta muzakerelerni kimsenen keçirmeymiz. Qırım halqınıñ iradesi boyunca Qırım Rusiye territoriyasıdır», – dey Lavrov.
Rusiye tış işler naziri Qırımnıñ qaytarılması mümkün olmağını aqqında defalarca bildirgen edi.
Ukraina prezidenti Petro Poroşenko Qırımnıñ işğal etilmesi boyunca muzakerelerniñ yañı halqara şeklini kirsetmek zaruriyeti aqqında bildire. Yanvar 14 künü Poroşenko matbuat konferentsiyasında işbu muzakerelerge Ukrainanıñ Avropa birligi ve AQŞ şeriklerini celp etmege kerek olğanını qayd etti.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı tarihiy adaletniñ tiklenmesi dep adlay.
