Link açıqlığı

Aslı qırımtatar ukrain yırcısı Camala «Yevrovideniye-2016» halqara yır yarışında Ukrainadan çıqışta bulunmaq içün milliy seçüvde iştirak etecek ola.

Bunı Camala içtimaiy ağlarda bildirdi.

«Televizion efirniñ çerçivesinde «1944» yırımnı taqdim etecek. Onı bıltır yazdım, menim içün timsaliy bir yırdır. Qartanamnıñ ailemiz ve qırımtatar halqımız ile 1944 senesi olğan facia aqqında ikâyesinden ilhamdır», – yazdı Camala Facebookta.

«Dedem cebede edi, şunıñ içün onı ve balalarnı qorçalap olamadı. Er kesni mal vagonlarına yüklep, bir qaç afta devamında Orta Asiyağa alıp kettiler. Bu insaniyetsiz şaraitlerge dayanıp olamağan ve açlıq ve suvsızlıqtan vefat etkenlerni yol boyu trenden atıp kete ediler. Qartanam da anda qızlarından birisini ğayıp etti. Menim içün bu şahsiy yır, em devletimizde, em tışında yaşağan insanlarnıñ bu ikâye aqqında haberdar olmasını isteymi», – dey o.

Ukrainada milliy seçüv yarım finalları fevral 6 ve 13 künleri keçirecek, final – fevral 21-de. Neticede Ukrainanı «Yevrovideniye-2016» temsil etecek artistniñ adı belli olacaq.

XS
SM
MD
LG