Ukrain rejissörı Ahtem Seytablayevniñ «Haytarma» serlevalı bediiy filmni İnari fin qasabasında tamır halqlarnıñ halqara kinofestivalinde taqdim ettiler. Filmni ATR qırımtatar telekanalınıñ baş müdiriniñ muavini Ayder Mujdabayev taqdim etti.
«Dünyanıñ çeşit memleketlerinden onlarce rejissör ve seyirci «Haytarma»nı elçırpmalar ile qarşıladı. Men ATR telekanalınıñ temsilcisi olaraq qırımtatarlarnıñ şimdiki vaziyeti aqqında olğan suallerge cevap berdim. Menim içün adiy olğan malümatnı tarif ettim. Reaktsiya – ayret. İnsanlar yanıma kelip, XXI asırda bütün halqqa nisbeten böyle bir basqınıñ etilmesi mümkünmi dep soray edi», – yazdı Mujdabayev Facebookta.
«Haytarma» filmi 1944 senesi qırımtatarlarnıñ sürgünligi aqqında tarif ete. Halqnıñ tarihında bu deşetli saife Sovet Birliginiñ eki defa Qaramanı, nam qazanğan uçucı qırımtatarı Amet-Han Sultannıñ noqtaiy nazarından aydınlatılğan.
Filmniñ ilk taqdimi 2013 senesi mayıs 17 künü oldı.
