Qırımtatar Milliy Meclisiniñ reisi Refat Çubarov Ahtem Çiygoz, Ali Asanov ve Mustafa Degermencige Aqmescitte yanvar 25-de qol tutmağa çağırdı. Bunı Çubarov Facebook saifesinde yazdı.
Bazarertesi künü, yanvar 25-de, Qırımnıñ Yuqarı mahkemesi «fevral 26 işi» boyunca toplaşuvnı keçirecek.
«Ahtem Çiygoz, Ali Asanov ve Mustafa Degermencige qol tutayıq! Ahtem Çiygoz qırımtatar halqı arasında o qadar belli ki, şimdi o degil, apiste ve adaletsiz «mahkeme»de başqa biri olsa, Ahtem özü kelip qol tutacağından ve semetdeşlerini bu maqsat içün birleştireceginden kimseniñ şübesi yoq», – yazdı Çubarov.
Yanvar 15 künü Qırımnıñ Rusiye prokurorı Natalya Poklonskaya iş iştirakçilerine qabaatnı seslendirgeninden soñ mahkeme «fevral 26 işinde» teneffüsni ilân etti. Mahkeme toplaşuvı keçirilgen binanıñ yanında o künü maküm etilgen qırımlılarnıñ soyları ve yaqınları, Qırımtatar Milliy Meclisiniñ azaları toplandı.
Mustafa Degermenci, Ali Asanov ve Ahtem Çiygoz bir buçuq yıl evelsi fevral 26 künü Qırım parlamenti yanında Ukraina topraq bütünliginiñ tarafdarları ve «Russkoye yedinstvo» («Rusiye birligi») firqasınıñ faalleri arasında teşkil olunğan «kütleviу tertipsizliklerde» iştirak etüvleri içün qabaatlana.
