Qırım blogeri Zair Akadırovnıñ sorğuğa celpnamesini imzalağan Qırımnıñ Rusiye prokuraturasınıñ hadimi Lübov Kardaş 2005 senesi Ukraina prezidentiniñ 29.11.05 №1670/2005 emiri ile qıraliçe Оlga adına III derece ukrain nişanı ile rağbetlendirildi, bunı Qırımtatar Milliy Meclisiniñ reisi, halq deputatı Refat Çubarov bildirdi.
«Bu «qurt adam-prokurornı» da aqlımızda tutayıq», – yazdı Refat Çubarov, ve şunı da qayd etti ki, 2002 senesi Lübov Kardaşqa «Qırım MC nam qazanğan adliyecisi» unvanı berildi.
Keçken afta Rusiye uquq qoruyıcıları tarafından yaqalnğan Qırım blogeri Zair Akadırovnı «dünki kün» boyunca sorğuğa çağırdılar. Bunı o Facebookta yazdı. O şunı da qayd etti ki, celpnamede «prokurornıñ çağıruvından saqlanuv içün memuriy mesüliyet belgilene».
Yanvar 15 künü Qırım Yuqarı mahkemesiniñ binası yanında, «fevral 26 işi» boyunca mahkeme toplaşuvınıñ başlanmasını beklegen qırımtatar jurnalisti Zair Akadırovnı yaqaladılar. Zair Akadırovnı onıñ zenaat faaliyeti aqqında soraştırdı ve bir saat devam etken sorğudan soñ azat ettiler. Bunıñ ile, jurnalistniñ aytqanına köre, onı mecburen Ekstremizmge qarşılıq boyunca merkezge alıp ketmege istey ediler, qorquzdılar.
Qırım Rusiye tarafından işğal etildi.
