Keçken afta Rusiye uquq qoruyıcıları tarafından yaqalnğan Qırım blogeri Zair Akadırovnı «dünki kün» boyunca sorğuğa çağırdılar. Bunı o Facebookta yazdı.
«Bugün, yanvar 22-de, saba saat sekizlerde evime politsiya hadimleri keldi. Bu vaqıtta evde degil edim. Aqmescitniñ Demiryol rayonı prokuraturasına çağırılğanımnı tuvğanlarıma bildirdiler. Sebebini añlatmadılar. Politsiya hadimleri «celpnameni» qaldırıp kettiler. Vesiqada qayd etilgeni kibi, meni (!) yanvar 21 künü saat 11:30 Demiryol rayonınıñ prokurorı L.Kardaş çağıra», – qayd ete Zair Akadırov.
O şunı da qayd etti ki, celpnamede «prokurornıñ çağıruvından saqlanuv içün memuriy mesüliyet belgilene».
«Meraqlı eken: prokuraturağa keçken vaqıtta çağırmaq», – yazdı Zair Akadırov.
Yanvar 15 künü Qırım Yuqarı mahkemesiniñ binası yanında, «fevral 26 işi» boyunca mahkeme toplaşuvınıñ başlanmasını beklegen qırımtatar jurnalisti Zair Akadırovnı yaqaladılar. Zair Akadırovnı onıñ zenaat faaliyeti aqqında soraştırdı ve bir saat devam etken sorğudan soñ azat ettiler. Bunıñ ile, jurnalistniñ aytqanına köre, onı mecburen Ekstremizmge qarşılıq boyunca merkezge alıp ketmege istey ediler, qorquzdılar.
Qırım Rusiye tarafından işğal etildi.
