Link açıqlığı

Uquq qoruyıcı: Cemilevniñ ğıyabiy apis cezası yarımadada içtimaiy kerginlikni quvetleştirir


Aqmescit Kiyev rayon mahkemesiniñ qırımtatarlarnıñ milliy yetekçisi Mustafa Cemilevniñ ğıyabiy apis cezası aqqında qararı yarımadada içtimaiy kerginlikni quvetleştirir, dep tüşüne İnsan aqları boyunca Qırım alan eyyetiniñ başı Andrey Yurov.

«Mustafanıñ bu kibi tedbirlerniñ alınmasına sebep ola bilgen deşetli cinayetleri aqta haberdar degilim. Eñ azından, Qırım yarımadasında etken faaliyetini alsaq, em de – bu nasıldır bir qattı bildirüvi ile bağlı ola bile. Amma onıñ qattı bildirüvleri de er vaqıt temelli edi», – dedi Yurov Qırım.Aqiqatqa.

Siyasiy taqiqatlar ukrain mustaqil merkeziniñ eksperti Yuliya Tişçenko aytqanı kibi, mahkeme qararı Rusiye areketlerini takbih etken qırımtatarlar ve diger qırımlılarnı qorquzmaq içün yapılğan arekettir.

«Qırımda Meclis kibi nasıldır bir qurulışlarnıñ teşkil etilmesi ve qırımtatarlarnıñ işğal ve bu rejimge boysunğanını köstermek içün yapılğan kampaniyanıñ nevbetteki qısmını köremiz», – dey Tişçenko.

Yaqında Qırım advokatı Cemil Temişev Aqmescitte Kiyev rayon mahkemesiniñ Mustafa Cemilevniñ yaqalanuvı boyunca qararı aqqında bildirdi. Bu malümatnı Rusiye matbuat vastalarına Qırım prokurorı Natalya Poklonskaya da tasdiqladı ve Cemilevniñ federal qıdıruvğa ilân etilgeni aqqında bildirdi.

İşğal etilgen Qırımda Mustafa Cemilevni sıñırdan qanunsız sürette keçüvde, silânıñ qanunsız tarzda saqlanuvında qabaatlaylar.

Ukraina Tış işler nazirliginiñ matbuat kâtibi Maryana Betsa Qırımda Ukraina prezidentiniñ qırımtatar halqınıñ işlerinden vekâletlisi ve Ukraina Yuqarı Radasınıñ deputatı Mustafa Cemilevniñ Rusiye mahkemesi tarafından taqibi mümkün olmağanı aqqında bildirde.

Mustafa Cemilevniñ özü Aqmescitte mahkeme qararını daa izaatlamadı.

Evel Ukraina halq deputatı, qırımtatar halqınıñ yetekçisi Mustafa Cemilevge Rusiye tarafından işğal etilgen yarımadağa kirişni yasaqladılar.

XS
SM
MD
LG