Poloniya Tış işler naziri Vitold Vashhikovskiy memleketiniñ Rusiye ile munasebetlerde ziddiyetlerni al etmege tırışqanını bildire, amma Poloniyanıñ Rusiye tarafından işğal etilgen Qırım ve Donbassnıñ Ukrainağa ait olması ile bağlı meselede mevamı denişmey qalğanını da qayd ete.
Bu aqta Vitold Vashhikovskiy Nasz Dziennik Poloniya mecmuasında yaza, haber ete Poloniya Radiosı.
Onıñ malümatına köre, Moskvada Poloniya ve Rusiye tış işler nazirleriniñ muavineri eki taraflama siyasiy mesleatlarnı keçirmeli. Poloniyada bıltır olğan saylavlardan soñ böyle seviyede ilk keçirilecek körüşüvdir.
«Poloniya Donbass ve Qırım vaqiaları boyunca öz mevamını deñiştirmez. Rusiyege nisbeten Qırımnıñ qanunsız işğali ve Donbasstaki istilâsından sebep kirsetilgen cezalarğa destegimiz Rusiyege qarşı degildir. Ukrainada barışıqnıñ olması içündir», – dedi diplomat.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı tarihiy adaletniñ tiklenmesi dep adlay.
