Link açıqlığı

Aqmescitniñ Kiyev rayonı mahkemesi yanvar 20-de Ukraina halq deputatı Mustafa Cemilevni ğıyabiy şekilde apiske almağa qarar aldı.

Bunı adliyecisi Cemil Temişev Facebook saifesinde bildirdi.

Onıñ aytqanına köre, taqiqatçı ve prokuror muracaatlarınıñ sebebini añlatıp, Mustafa Cemilevge qarşı Rusiye Ceza kodeksiniñ üç maddesi boyunca cinaiy iş açılğanını, onıñ «taqiqat ve mahkemeden saqlanğanını, şaatlarğa basqı yapa bilgenini, delillerni yoq ete bilecegini, diger devletniñ vatandaşı olğanını, Qırımda daimiy olaraq oturğan yeri olmağanını» qayd ettiler.

Аl-azırda Mustafa Cemilev Rusiyede federativ derecede qıdırıla.

Mahkeme taqiqatçınıñ muracaatını qabul etip, Cemilevni ğıyabiy şekilde apiske almağa qarar berdi.

Adliyeci hatırlattı ki, al-azırda Mustafa Cemilev Rusiyede federativ derecede qıdırıla.

İşğal etilgen Qırımda Mustafa Cemilevni sıñırnı qanunsız alda keçüv, qanunsız silâ alması ile qabaatlaylar.

Mustafa Cemilev Aqmescit mahkemesiniñ qararını şimdilik izaatlamadı.

Qırımtatar Milliy Meclisiniñ reisi Refat Çubarov Qırım mahkemesiniñ qararını izaatlap, Facebookta şunı yazdı: «Bundan evel, Rusiye işğalcileri meni ğıyabiy şekilde apiske almağa ve «federal qıdıruvğa» ilân etmege qarar alğanda, Mustafa ağa şaqa etti: «Meraqlı, saña qarşı qarar bar, maña qarşı– yoq». Mına, işğalciler «hatasını tüzettiler».

Ukraina Tışqı işler nazirligi Qırımdaki Rusiye mahkemesiniñ Cemilevni apis aluv qararını takbih etti

Ukraina Tışqı işler nazirliginiñ matbuat kâtibi Maryana Betsa Qırımda Rusiye mahkemesiniñ Ukraina prezidentiniñ qırımtatar halqınıñ işlerinden vekâletlisi ve Ukraina Yuqarı Radasınıñ deputatı Mustafa Cemilevni taqip etmek aqqı yoq, dep qayd etti.

«Qırımtatarlarğa qarşı basqı yapılmamalı. İşğalci akimiyetniñ areketlerini takbih etemiz», – dep yazdı Betsa Twitterde.

Ukraina halq deputatı, qırımtatar halqınıñ lideri Mustafa Cemilevge Rusiye tarafından işğal etilgen yarımadağa kirişi 2014 senesi mayısta yasaq etilgen edi.

2014 senesiniñ başında Rusiye Qırımnı işğal etti.

XS
SM
MD
LG