Ukraina Milliy havfsızlıq ve mudafaa şurasınıñ (SNBO) kâtibi Оleksandr Turçinov cumaaqşamı künü Ukraina ve Türkiyeniñ Qara deñiz regionında küç musaviyliginiñ bozuluvına qarşılıq kösterilmesi içün siyasiy-diplomatik, arbiy-tehnikiy ve iqtisadiy resurslarını birleştirmege imkânı bar olğanını bildirdi.
Bu yolda esas adım – Qırımnıñ işğalden azat etilmesi olğanını qayd etti, bunı o Türkiye Milliy havfsızlıq şurasınıñ (SNB) baş kâtibi Seyfullah Hacımuftioğlu ile körüşüvi devamında bildirdi.
«Devletlerimiz arasında eki taraflama munasebetlerniñ ve işbirlik inkişafınıñ yañı keyfiyeti ola bile», – dedi Turçinov.
Türkiye SNB baş kâtibiniñ fikrine köre, «devletlerimiz regional havfsızlıq sistemasınıñ teşkil etilmesinde baş rollerni icra etmeli».
«Bizim içün devletlerimizniñ imkâniyetlerini birleştirmege pek müim bir şeydir», – dedi Hacımuftioğlu.
Türkiye Ukrainanıñ Qırım boyunca birinci ittifaqdaşı ola, Rusiye tarafından yarımadanıñ işğalini tanımay ve işğal etilgen yarımadada qırımtatarlarnıñ aqlarınıñ bozuluvı içün Moskvanı takbih ete.