Link açıqlığı

Qırımdan köçip kelgen rejissör Galina Cikayeva Kiyevniñ PostPlay teatrinde yarımadanıñ Rusiye işğaline qırımlılarnıñ qarşılığına bağışlanğan «Fevral 26 işi» oyunını taqdim ete. Bunı o Qırım.Aqiqatqa bildirdi.

Baş qaramanlar rollerini 2014 senesi fevral 26 künü Qırım parlamenti divarları altında keçirilgen kütleviy mitingniñ iştirakçileri icra etecek.

«Qırımnıñ eki yıllıq Rusiye işğalinden soñ Kiyevde fevral 26 künü Aqmescitte ne olğanı aqqında kimse bir şey bilmegenini ögrendik. Şunıñ içün bu malümatnıñ birinci şahıslardan tarif etilmesini ister edim. Oyunda o vaqıt vaqialarnıñ eñ kergin yerlerinde olğanlar iştirak etecek. Öz duyğuları, noqtaiy-nazarı, «fevral 26 işi»niñ ilerilemesi aqqında tarif etecekler», – dedi o.

Galina Cikayeva oyunnı işğalde qalğan qırımlılarnıñ körecegine ümüt besley. Bu maqsat içün PostPlay teatrinde online yayınlavnı teşkil etecek olalar ve buña yardım soraylar.

«Oyun içün proektor ve teatrde yahşı İnternetniñ olması kerek. Bu aqta çoq insnannıñ ve Qırımnıñ bilmesini isteymiz, olarnı unutmadıq ve taşlamaycaqmız, bunı bilsinler», – dey Cikayeva.

Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı tarihiy adaletniñ tiklenmesi dep adlay.

XS
SM
MD
LG