Ukraina prezidenti Petro Poroşenko Qızıl Haçnıñ Halqara komitetiniñ reisi Peter Maurerniñ diqqatını Rusiye tarafından işğal etilgen Qırımda insan aqlarınıñ bozuluvına celp etti. Bu aqta İsveçreniñ Davos şeerinde keçirilgen körüşüvinde söz yürütken ediler, dey ukrain prezidentiniñ matbuat kâtibi Svâtoslav Tsegolko.
«Poroşenko Qızıl Haçnıñ diqqatını Rusiye tarafından işğal etilgen Qırımda insan aqlarınıñ bozuluvına celp etti», – yazdı Tsegolko Twitterde.
Matbuat kâtibiniñ sözlerine köre, Poroşenko Qızıl Haçnıñ Halqara komitetiniñ reisini Rusiyede mabüs olğan ukrainlerniñ azat etilmesine qol tutmağa çağırdı.
Petro Poroşenko iş ziyareti ile İsveçrede buluna.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı tarihiy adaletniñ tiklenmesi dep adlay.
