Ukraina Rusiye tarafından işğal etilgen Qırımnı qaytarmaq içün yaqın vaqıtta yañı diplomatik basqını başlaycaq ola, dedi Ukraina maliye naziri Nataliya Yaresko.
«Qırımnıñ ğayıp oluvı ile razı degilmiz. Bu sene Qırımnıñ qaytarılması ketişatında ileri adımlaycaqmız»,– o dedi Reuters agentligine.
Şu cümleden, dey o, Ukraina 2014 senesi Ukraina, Rusiye, AQŞ ve AB iştiraki ile çalışqan «Jeneva şeklinde» forumnı teşkil etecek ola, Rusiye bu formatnıñ ğayrıdan tiklenmesine qarşı çıqtı.
«Qırımnıñ Ukrainağa qaytarılması aqqında dialognı başlamaq içün «Jeneva» formatından daa da keniş bir şekliniiñ olmasını isteymiz», – dedi Yaresko.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
