Link açıqlığı

Qırımtatar Milliy Meclisinde Qırımda insanlarnıñ ğayıp oluvı sebebinden tuvğanlarğa köz-qulaq olmağa çağıralar


Qırımtatar Milliy Meclisi reisiniñ birinci muavini Nariman Celâl yarımadada insanlarnıñ ğayıp oluvı sebebinden vatandaşlarnı öz tuvğanlarına köz-qulaq olmağa çağıra.

«Qırımda insanlarnıñ ğayıp oluvı devam ete. Biz ve uquq qoruyıcı dostlarımız er bir vaqianı taqip etip, ne olğanını ögrenmege tırışamız. Mıtlaqa öz balalarıñıznı oquv yerlerine ozğarıñız, ya da olarnıñ yalıñız degil de, dostlarınen olğanına inanıñız. Er vaqıt olarnen bağ tutıñ, esasen soqaqlarda insan az olğan vaqıtta», – dep yazdı Celâl Facebookta.

«Yürüş yolunı öyle qurıñız ki, yol boyu videokamera, gece-kündüz ya da saba erte çalışmağa başlağan tükânlarnıñ sayısı çoq olsun. Olarnı ozğarmağa ve qarşılamağa usanmañız. İnsannıñ ğayıp olması aqqında bir şübe olğanda, birden haber etiñ. Bugün telâşsız olmağa mümkün degil», – dedi o.

Qırımnıñ işğalinden soñ yarımadada qırımtatarlar ğayıp ola. Soñki vaqialar arasında – Aqmescittebelgisiz coyulğan Ernest Ablâzimov ve 16 yaşında Elvina Rizakova, 2015 senesi dekabr ayında Keriçte eki adam ğayıp oldı: Ruslan Ganiyev ve dostu Arlen Terehov. 2014 senesi mayıs 30-da Seyran Zinedinov, 2014 senesi sentâbr 27 künü – İslâm Cepparov ve Cavdet İslâmov, 2014 senesi oktâbr 3-de – Eskender Apselâmov ğayıp oldılar.

Qırım Taqiqat komiteti bu insanlarnıñ ğayıp oluvı sebebinden cinaiy işlerni aça, amma insanlarnıñ bulunuv yerleri alâ daa belgisiz.

XS
SM
MD
LG