Link açıqlığı

Qırımlılar İnsan aqları boyunca Avropa mahkemesine muracaat etmege azır degil – Emine Ceppar


Qırımlılar İnsan aqları boyunca Avropa mahkemesinde (ECtHR) öz aqlarını qorumağa azır degil, dep tüşüne haber siyaseti naziriniñ keñeşçisi Emine Ceppar. Bu aqta o, professor Aleksandr Zadorojnıynıñ «Qırım işğali – halqara cinayet» kitabınıñ taqdimine bağışlanğan matbuat konferentsiyasında bildirdi.

ECtHRde öz aqlarını qorumağa keder etken qorqudır, dey Ceppar.

«Şahsen men ECtHR çerçivesinde şahsiy davalarğa inanmaıyım. Qırımda yaşağanlar yalıñız halqara meydançıqlarda aqlarını qorumağa degil de, jurnalistlerge intervyü bile bermege qorqalar», – dey o.

Emine Cepparnıñ fikrine köre, ukrain devleti ECtHRde öz aqlarını qorumağa istegen vatandaşlarına qol tutmalı.

«Menimce, Ukraina mında idareci rolüni icra ete bile… Bu meselelerniñ devlet seviyesinde al etilmesi Ukrainağa itibarını kötermege imkân berir edi», – dey nazirniñ keñeşçisi.

Aleksandr Zadorojnıy aytqanı kibi, şimdilik mahkemege bu kibi şikâyetleri ile bir 700 insan muracaat etti.

Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG