Ukraina Devlet sıñır hızmeti Qırım qamaçavı boyunca aktsiyasınıñ iştirakçileri ile birlikte yarımada ile memuriy sıñırda nezaretni keçirmege azırlana.
Bunı ukrain hızmetiniñ matbuat hızmeti bildire.
«Cemaat teşkilâtlarınıñ faalleri ile – ticariy qamaçavnıñ iştirakçileri ile – ve qırımtatar halqınıñ temsilcilerinen vaqtınca işğal etilgen Qırım ile memuriy sıñırda nezaretniñ keçirilmesi içün umumiy temel işlenile. Bunıñ ile «Vatandaşlarnıñ cemaat nizamı ve devlet sıñırınıñ qoruvında iştiraki aqqında» Ukraina qanunına köre işbirlik alıp barıla», – denile beyanatta
Qırımtatar Milliy Meclisiniñ reisi Refat Çubarov jurnalistlerge aytqanı kibi, Qırım qamaçavınıñ şekli deñiştirilmesinden soñ, onıñ iştirakçileri Ukraina Devlet sıñır hızmeti ve Ukraina gümrük hızmetiniñ Qırım ile memuriy sıñırda areketlerini nezaret etecek ola.
Onıñ sözlerine köre, yanvarniñ soñki eki aftası devamında faaller bu iş içün azırlıq körecek. Hızmetke fevral 1-den başlaycaqlar.
