Ukrainanıñ mustaqil media-zenaat birligi Ukraina Baş prokuraturası yanında Qırım Muhtar Cumhuriyetiniñ prokuraturasından Qırımda Rusiye politsiya hadimleri tarafından yanvar 15 künü Aqmescitte Qırım blogeri Zair Akadırovnı yaqalmaq ıntıluvı boyunca cinaiy işni açmağa talap ete. Bu aqta mustaqil media-zenaat birliginiñ saytında aytıla.
«Zair Akadırov ile olğan vaqiat işğalci akimiyetniñ teşviqatçı emirleri boyunca çalışmağa istemegen yerli jurnalistlerniñ yaqalav sırasınıñ devamı oldı. Qırımnıñ eki yıllıq işğali devamında anda ayrı jurnalistler ve muarririyetlerge nisbeten ayırım siyaseti devam ete. Şu cümleden, yerli uquq qoruyıcılar jurnalistlerniñ şahsiy evlerinde tintüvlerni keçire, olarnı qorquzalar, qanunsız cinaiy işlerniñ iştirakçileri ola. Bundan sebep, öz ve tuvğanlarınıñ ayatalarını qurtarıp, yarımadadan ketmege mecbur», – denile beyanatta.
Media-zenaat birliginde qayd etilgeni kibi, ukrain tarafı bu şaraitlerde Qırımda matbuat vastalarınıñ temsilcilerine nisbeten qanunsız areket etkenlerni qayd etmeli.
«Cinaiy işniñ doğru ihtisası olmasına diqqat etemiz. Zair Akadırovnıñ yaqalavı şaatı ve onıñ özü bastırğan malümatlardan körgenimiz kibi, işğalci politsiya temsilcileri onı tek yaqalamadı da, tutıp esir etmege, aytqanları kibi, «mağazğa alıp ketmege» tırışqandar. Cinaiy işte bunı aks etmek kerek», – deyler mında.
Yanvar 15 künü Qırım Yuqarı mahkemesiniñ binası yanında, «fevral 26 işi» boyunca mahkeme toplaşuvınıñ başlanmasını beklegen qırımtatar jurnalisti Zair Akadırovnı yaqaladılar. Zair Akadırovnı onıñ zenaat faaliyeti aqqında soraştırdı ve bir saat devam etken sorğudan soñ azat ettiler. Bunıñ ile, jurnalistniñ aytqanına köre, onı mecburen Ekstremizmge qarşılıq boyunca merkezge alıp ketmege istey ediler, qorquzdılar.
